മലയാളത്തിന്റെ ആക്ഷന്‍ താരം ആദ്യമായി മിനിസ്‌ക്രീനില്‍ ചുവട് വെയ്ക്കുന്നു. കോടീശ്വരന്‍ എന്ന ഗെയിം ഷോയിലൂടെയാണ് സുരേഷ് ഗോപിയുടെ ടെലിവിഷന്‍ പ്രവേശനം. മുമ്പ് ഹിന്ദി ചാനലില്‍ നടന്നിരുന്ന കോന്‍ ബനേഗാ ക്രോര്‍പതിയുടെ മലയാളം പതിപ്പാണ് ഇത്. റിലയന്‍സിന്റെ ബിഗ് സിനര്‍ജി പ്രൊഡക്ഷനാണ് ഈ പരിപാടിയുടെ നിര്‍മ്മാണം
വന്‍തുകകളാണ് ഈ പരിപാടിയില്‍ പങ്കെടുത്ത് വിജയിക്കുന്നവര്‍ക്ക് ലഭിക്കുക.

നിരവധി മലയാളം ചിത്രങ്ങള്‍ക്ക് ഹിന്ദി റീമേക്ക് സൃഷ്ടിച്ച പ്രിയദര്‍ശന്‍ മേരിക്കുണ്ടൊരു കുഞ്ഞാട് എന്ന ചിത്രത്തിന് റീമേക്ക് ചെയ്യുന്നു. ദിലീപും, ബിജു മേനോന്‍ എന്നിവര്‍ ചെയ്ത വേഷങ്ങള്‍ രണ്‍ബീര്‍ കബീര്‍, സുനില്‍ ഷെട്ടി എന്നിവര്‍ ചെയ്യുന്നു. മലാമല്‍ വീക്കിലി എന്ന പേരിലാണ് ഈ ചിത്രം നിര്‍മ്മിക്കുന്നത്. പ്രിയദര്‍ശന്റെ മറ്റൊരു ചിത്രം തെസ് അവസാന ഘട്ടത്തിലാണ്. മോഹന്‍ലാല്‍ ഇതിലൊരു പ്രധാന വേഷം ചെയ്യുന്നുണ്ട്.

മലയാള സിനിമയിലെ പ്രശ്സതമായ കൂട്ടുകെട്ട് വീണ്ടും ഒരുമിക്കുന്നു. പതിനൊന്ന് വര്‍ഷങ്ങളുടെ ഇടവേളക്ക് ശേഷമാണ് ഈ കൂടിച്ചേരല്‍. യാത്രക്കാരുടെ ശ്രദ്ധക്ക് എന്ന ചിത്രമാണ് ഇവര്‍ ഒരുമിച്ച് അവസാനം ചെയ്തത്. മസ്‌കറ്റില്‍ നടന്ന ഒരു ചടങ്ങിലാണ് സത്യന്‍ അന്തിക്കാട് ഈ വിവരം പറഞ്ഞത്. സന്ദേശം പോലൊരു ചിത്രമാണ് സത്യന്‍ അന്തിക്കാട് പ്ലാന്‍ ചെയ്യുന്നത്. ബെന്നി പി.നായരമ്പലമാണ് കഥയെഴുതുന്നത്. 2013 ല്‍ ചിത്രം ആരംഭിക്കും. മറ്റ് കാര്യങ്ങളൊന്നും സ്ഥിരീകരിച്ചിട്ടില്ല.

ദിലീപിനെ നായകനാക്കി സന്ധ്യാമോഹന്‍ സംവിധാനം ചെയ്യുന്ന ചിത്രമാണ് മി. മരുമകന്‍. ദിലീപ്, ഭാഗ്യരാജ്, ഖുശ്ബു, ഷീല, ബിജു മേനോന്‍, നെടുമുടി വേണു എന്നിവര്‍ പ്രധാന വേഷങ്ങളില്‍ അഭിനയിക്കുന്നു. നിര്‍മ്മാണം മാഹാ സുബൈര്‍, നെല്‍സണ്‍ ഈപ്പന്‍ എന്നിവര്‍ ചേര്‍ന്ന്. സുരേഷ് പീറ്റേഴ്‌സ്, രാജാമണി എന്നിവര്‍ സംഗീതം നല്കുന്നു ചിത്രത്തിന്റെ രചന ഉദയ്കൃഷ്ണ-സിബി കെ. തോമസ് ആണ്.

തന്റെ പുതിയ ചിത്രമായ പത്മശ്രീ ഭരത് ഡോ. സരോജ് കുമാര്‍ എന്ന ചിത്രത്തിലൂടെ മോഹന്‍ലാലിനെ അവഹേളിച്ചെന്ന ആരോപണം ഉയരവേ തന്റെ ചിത്രത്തിന് ഡേറ്റ് നല്കാത്തതിനാലാണ് ശ്രീനിവാസന്‍ ഇത്തരത്തില്‍ സിനിമയില്‍ ചിത്രീകരിച്ചതെന്ന് പ്രചാരണം. ഉദയനാണ് താരത്തിന്റെ രണ്ടാം ഭാഗമായാണ് ഈ ചിത്രം ശ്രീനിവാസന്‍ തയ്യാറാക്കിയിരുന്നത്. എന്നാല്‍ മോഹന്‍ലാല്‍-ശ്രീനിവാസന്‍ കൂട്ടുകെട്ടില്‍ അവസാനമിറങ്ങിയ ഒരു നാള്‍ വരും തിയേറ്ററില്‍ പരാജയമായിരുന്നു. അതിനാല്‍ മോഹന്‍ലാല്‍ ഡേറ്റ് നല്കാന്‍ മടിച്ചു. തുടര്‍ന്ന് മോഹന്‍ലാലിനെ പ്രത്യക്ഷത്തില്‍ തന്നെ കളിയാക്കുന്ന സിറ്റുവേഷനുകളുമായാണ് സരോജ് കുമാറിനെ ശ്രീനിവാസന്‍ പുറത്തിറക്കിയത്. കേണല്‍ പദവിയും, റെയ്ഡും എല്ലാം ഇതില്‍ വിഷയമായി.
മോഹന്‍ലാലിന്റെ സഹായിയായ ആന്റണിപെരുമ്പാവൂര്‍ തുടര്‍ന്ന് ചിത്രത്തിന്റെ കാമറാമാന്‍ എസ്.കുമാറിനെ വിളിച്ച് രോഷം പ്രകടിപ്പിച്ചിരുന്നു. എന്നാല്‍ താന്‍ ഈ ചിത്രം ഒരു സറ്റയര്‍ എന്ന നിലയിലാണ് കാണുന്നതെന്നും ഇത് ഉദയനാണ് താരത്തിന്റെ തുടര്‍ച്ചയല്ലെന്നും ശ്രീനിവാസന്‍ പറയുന്നു.
എന്തായാലും ചിത്രം തീയേറ്ററില്‍ പരാജയപ്പെട്ടതായാണ് റിപ്പോര്‍ട്ട്.

നയന്‍താര ആരാധകര്‍ക്ക് സന്തോഷവാര്‍ത്ത… നയന്‍താര അഭിനയ രംഗത്തേക്ക് മടങ്ങിവരുന്നു. തെലുങ്ക് ചിത്രമായ ശ്രീരാമരാജ്യം എന്ന ചിത്രത്തിന് നയന്‍താര കാള്‍ഷീറ്റ് നല്കിക്കഴിഞ്ഞു. പ്രൊഡ്യൂസറുടെയും, സംവിധായകരുടെയും നിര്‍ബന്ധത്തെ തുടര്‍ന്നാണ് ഈ തീരുമാനം നയന്‍താര എടുത്തത്. ദശരഥ് സംവിധാനം ചെയ്യുന്ന ചിത്രത്തില്‍ നാഗാര്‍ജ്ജുനയാണ് നായകന്‍.
ദശരഥ് പ്രഭുദേവയുടെ സുഹൃത്താണ്. നാഗാര്‍ജ്ജുനക്കൊപ്പം അവസാനമായി നയന്‍താര അഭിനയിച്ചത് ബോസ് ഐ ലവ് യു എന്ന ചിത്രത്തിലാണ്.
ശ്രീരാമരാജ്യത്തിന്റെ നിര്‍മ്മാണം കാമാക്ഷി മുവീസിന്റെ ബാനറില്‍ ഡി. ശിവപ്രസാദ് റെഡ്ഡിയാണ്.

ഇന്ന് അന്തരിച്ച സുകുമാര്‍ അഴീക്കോടിനെ മോഹന്‍ലാല്‍ അന്ത്യദിനത്തിന് ഒരു നാള്‍ മുമ്പ് സന്ദര്‍ശിച്ചു. ഇരുവരും തമ്മില്‍ നടന്ന വാക് പയറ്റ് കേരളത്തില്‍ ഏറെ വിവാദങ്ങളുയര്‍ത്തിയിരുന്നു. തുടര്‍ന്ന് കോടതിയെ സമീപിച്ച ഇവര്‍ അടുത്തിടെ കേസുകള്‍ ഒത്തുതീര്‍പ്പിലാക്കിയിരുന്നു.
ഇന്നുവരെയും സുകുമാര്‍ അഴീക്കോടിനെ നേരിട്ട് കണ്ടിട്ടില്ലാത്ത മോഹന്‍ലാല്‍ അമല ആശുപത്രിയില്‍ ചെന്ന് അഴീക്കോടിനെ കാണുകയായിരുന്നു. മുമ്പ് അഴീക്കോടിന് സുഖമില്ലെന്നറിഞ്ഞ് മോഹന്‍ലാല്‍ ഫോണ്‍ചെയ്ത് വിവരങ്ങള്‍ അന്വേഷിച്ചിരുന്നു. മയക്കത്തിലായിരുന്ന അഴീക്കോട് തന്നോട് സംസാരിച്ചില്ലെങ്കിലും തന്റെ സാന്നിധ്യം അറിഞ്ഞിട്ടുണ്ടാകുമെന്ന് ലാല്‍ പിന്നീട് പറഞ്ഞു.

യുവതലമുറയിലെ ശ്രദ്ധേയയായ നായികാ നടി അനന്യ വിവാഹിതയാകുന്നു.നാടോടികള്‍, എങ്കെയും എപ്പോതും എന്നീ ചിത്രങ്ങളിലൂടെയാണ് അനന്യ ശ്രദ്ധിക്കപ്പെട്ടത്.
തൃശൂര്‍ സ്വദേശി ആഞ്ജനേയനാണ് വരന്‍. ഫെബ്രുവരി 23 ന് എന്‍ഗേജ്‌മെന്റ് നടക്കും. മാതാപിതാക്കള്‍ ഇടപെട്ട് ഉറപ്പിച്ച വിവാഹമാണ് ഇത് എന്ന് അനന്യ പറയുന്നു. എന്‍ഗേജ്‌മെന്റ് ചടങ്ങുകള്‍ അനന്യയുടെ പെരുമ്പാവൂരിലുള്ള വീട്ടില്‍ നടക്കും. അടുത്ത ബന്ധുക്കളും, സൂഹൃത്തുക്കളുമേ ക്ഷണിക്കപ്പെട്ടിട്ടുള്ളു.
ബിസിനസ്‌കാരനാണ് ആഞ്ജനേയന്‍.
വിവാഹത്തിന് ശേഷം തുടര്‍ന്ന് അഭിനയിക്കുമോയെന്ന് അറിയില്ലെന്നും, ഭര്‍ത്താവ് ഇക്കാര്യം തീരുമാനിക്കുമെന്നും അനന്യ പറഞ്ഞു. തന്റെ മാതാപിതാക്കളുടെ തീരുമാനത്തില്‍ താന്‍ സന്തുഷ്ടയാണെന്നും അനന്യ പറഞ്ഞു. അനന്യ ഇപ്പോള്‍ ഇരവും പകലും എന്ന ചിത്രത്തില്‍ അഭിനയിച്ചുകൊണ്ടിരിക്കുകയാണ് ഇപ്പോള്‍.

അമല്‍ നീരദിന്റെ പുതിയ ചിത്രം ബാച്ചിലര്‍ പാര്‍ട്ടി ഹാങ്ങോവറെന്ന ഇംഗഌഷ് ചിത്രത്തിന്റെ കോപ്പിയാണെന്നതിനെ ചൊല്ലി ഊഹാപോഹങ്ങള്‍ പ്രചരിക്കുന്നു.
പ്രഥ്വിരാജ്, ഇന്ദ്രജിത്, അസിഫ് അലി, കലാഭവന്‍ മണി, റഹ്മാന്‍ എന്നിവര്‍ പ്രധാനവേഷങ്ങള്‍ ചെയ്യുന്ന ഈ ചിത്രം ഒരു കൂട്ടം സുഹൃത്തുക്കളുടെ കഥയാണ്. വളരെ പ്രശസ്തമായ ഹോളിവുഡ് ചിത്രമാണ് ഹാങ്ങോവര്‍. 2009 ല്‍ റിലീസായ ഈ ചിത്രം സൂപ്പര്‍ഹിറ്റ് കോമഡി ചിത്രമായിരുന്നു.
എന്നാല്‍ അഭ്യൂഹങ്ങളെ തള്ളിക്കളഞ്ഞ് എല്ലാം സ്‌കരീനില്‍ കാണാം എന്നാണ് സംവിധായകന്റെ പ്രതികരണം.
അമല്‍ നീരദിന്റെ ബിഗ് ബി എന്ന ചിത്രത്തിന് ഒരു ഹോളിവുഡ് ചിത്രത്തോടുള്ള സാമ്യം മുമ്പ് പല ആരോപണങ്ങള്‍ക്കും വഴി വെച്ചിരുന്നു.

ഏറെ നാളായി കാത്തിരിക്കുന്ന ചിത്രം കാസനോവ റിപ്പബ്ലിക് ദിനമായ ജനുവരി 26 ന് റിലീസ് ചെയ്യും. ബിഗ് ബഡ്ജറ്റ് ചിത്രമായ മോഹന്‍ലാലിന്റെ ഈ ചിത്രം കേരളത്തില്‍ നൂറ്റിഅന്‍പതോളം തീയേറ്ററുകളില്‍ റിലീസ് ചെയ്യും.
റോഷന്‍ ആന്‍ഡ്രൂസ് സംവിധാനം ചെയ്യുന്ന ഈ ചിത്രത്തിന്റെ തിരക്കഥ ബോബി സഞ്ജയ് ആണ്. കോണ്‍ഫിഡന്റ് ഗ്രൂപ്പിന്റെ ബാനറില്‍ ഡോ. സി.ജെ റോയ് ചിത്രം നിര്‍മ്മിക്കുന്നു. ശ്രേയ, ലക്ഷ്മി റായ്, റോമ, സഞ്ജന്‍, ജഗതി എന്നിവര്‍ പ്രമുഖവേഷങ്ങളിലെത്തുന്നു. വിദേശ രാജ്യങ്ങളിലാണ് ചിത്രം ഏറിയപങ്കും ചിത്രീകരിച്ചത്.