സിനിമാ സംവിധായകരായ കമലിനും ജയരാജിനും വിതരണക്കാരുടെ സംഘടനയായ ഡിസ്ട്രിബ്യൂട്ടേഴ്സ് അസോസിയേഷന് വിലക്കേര്പ്പെടുത്തി. അസോസിയേഷന്റെ തീരുമാനത്തെ മറികടന്ന് സിനിമകള് റിലീസ് ചെയ്തതിനെത്തുടര്ന്നാണ് നടപടി. ഇനി ഇവര് സംവിധാനം ചെയ്യുകയോ നിര്മിക്കുകയോ ചെയ്യുന്ന ചിത്രങ്ങള് വിതരണത്തിനെടുക്കരുതെന്നാണ് തീരുമാനം.
കമലിന്റെ ‘സ്വപ്നസഞ്ചാരി’യും ജയരാജിന്റെ ‘നായിക’യും 25ന് റിലീസ് ചെയ്തിരുന്നു. ഇതേ തുടര്ന്നാണ് ഇരുവര്ക്കും വിലക്കേര്പ്പെടുത്താന് ഡിസ്ട്രിബ്യൂട്ടേഴ്സ് അസോസിയേഷന് തീരുമാനിച്ചത്.
മുല്ലപ്പെരിയാര്പോലുള്ള നീറുന്ന വിഷയത്തിന്റെ സമയത്ത് സംഭവിച്ച വിലക്കിനെ കാര്യമാക്കുന്നില്ലെന്ന് സംവിധായകന് കമല് പ്രതികരിച്ചു. വിലക്കിനെക്കുറിച്ച് തങ്ങളുടെ സംഘടനയായ ഫെഫ്ക ഔദ്യോഗികമായി പ്രതികരിക്കുമെന്നാണ് ജയരാജ് പറഞ്ഞത്.
കമലിനും ജയരാജിനും പിന്തുണയുമായി ഫിലിം എക്സിബിറ്റേഴ്സ് ഫെഡറേഷന് രംഗത്തെത്തിയിട്ടുണ്ട്.
