വില്ലന്‍ വേഷങ്ങളിലൂടെ ശ്രദ്ധനേടി ഇപ്പോള്‍ കോമഡി വേഷങ്ങളിലൂടെ അഭിനയത്തില്‍ സജീവമായ ഭീമന്‍ രഘു സംവിധായകനാകുന്നു. വര്‍ഷങ്ങള്‍ക്ക് മുമ്പ് സംവിധാനത്തില്‍ ഒരു കൈനോക്കാനിറങ്ങിയ ഭീമന്‍ രഘുവിന്‍റെ ശ്രമം പരാജയപ്പെട്ടിരുന്നു. നിര്‍മ്മാണം പാതിവഴിയില്‍ നിലച്ച ചിത്രത്തില്‍ ഒരു ബോളിവുഡ് നടിയായിരുന്നു നായിക. നിര്‍മ്മാതാവും, സംവിധായകനും തമ്മില്‍ തെറ്റിപ്പിരിയുകയും, ഒടുവില്‍ കേസാവുകയും ചെയ്തു. പുതിയ ചിത്രത്തില്‍ ഭീമന്‍ രഘു തന്നെയാണ് പ്രധാന റോള്‍ ചെയ്യുന്നത്. സത്യന്‍ കുളങ്ങാടാണ് ചിത്രത്തിന്‍റെ രചന നിര്‍വ്വഹിക്കുന്നത്. ജൂണില്‍ ചിത്രത്തിന്‍റെ ഷൂട്ടിംഗ് ആരംഭിക്കും. ചിത്രത്തിന് പേരിട്ടിട്ടില്ല.

അരുണ്‍ കുമാര്‍ അരവിന്ദ് സംവിധാനം ചെയ്യുന്ന ലെഫ്റ്റ് റൈറ്റ് ലെഫ്റ്റ് ജൂണ്‍ 7 ന് റിലീസ് ചെയ്യും. ഈ അടുത്ത കാലത്ത് എന്ന ചിത്രത്തിന് ശേഷം അരുണ്‍ കുമാര്‍ അരവിന്ദ് – മുരളി ഗോപി ഒന്നിക്കുന്ന ചിത്രമാണിത്. മുരളി ഗോപിയാണ് ചിത്രത്തിന്‍റെ രചന നിര്‍വ്വഹിച്ചിരിക്കുന്നത്. മുരളി ഗോപിയും പ്രധാന വേഷത്തിലെത്തുന്ന ചിത്രത്തില്‍ ഇന്ദ്രജിത്, ലെന, രമ്യ നമ്പീശന്‍, ഹരീഷ് തുടങ്ങിയവരഭിനയിക്കുന്നു.

ഫഹദ് ഫാസില്‍ അഭിനയിക്കുന്നതില്‍ നിന്ന് പിന്‍മാറിയ അയ്യര്‍ ഇന്‍ പാക്കിസ്ഥാന്‍ എന്ന ചിത്രത്തില്‍ ഉണ്ണി മുകുന്ദന്‍ നായകനാകുന്നു. ഫസല്‍ സംവിധാനം ചെയ്യുന്ന ഈ ചിത്രം നിര്‍മ്മിക്കുന്നത് എം.മണിയാണ്. തിരക്കഥ തൃപ്തികരമല്ലെന്ന് പറഞ്ഞ് ഫോട്ടോഷൂട്ടിന് ശേഷം ഫഹദ് പിന്‍മാറിയ ചിത്രമാണിത്. തുടര്‍ന്ന് ഫഹദിനെതിരെ നിര്‍മ്മാതാവ് പരാതി നല്കിയിരുന്നു. ജഗതിയുടെ മകള്‍ ശ്രീലക്ഷ്മിയാണ് ഈ ചിത്രത്തിലെ ഒരു നായിക. തുടര്‍ച്ചയായ പരാജയങ്ങളിലാണ് ഇപ്പോള്‍ ഉണ്ണി മുകുന്ദന്‍. അവസാനമായി തീയേറ്ററിലെത്തിയ ഒറീസ്സക്കും, പാതിരാമണലിന്‍റെ ഗതിയാണ്. അയ്യര്‍ ഉണ്ണിയെ തുണക്കുമെന്ന് പ്രതീക്ഷിക്കാം.

ദുല്‍ഖറിന് നായകയായി മണിപ്പൂരി സ്വദേശി സുര്‍ജബാല വരുന്നു. ബോളിവുഡില്‍ ചെറു വേഷങ്ങള്‍ ചെയ്ത സുര്‍ജബാല നീലാകാശം, പച്ചക്കടല്‍. ചുവന്ന ഭൂമി എന്ന ചിത്രത്തിലാണ് ദുള്‍ഖറിന് നായികയാകുന്നത്. റോഡ് മൂവി ഗണത്തില്‍ പെടുന്ന ഈ ചിത്രം സംവിധാനം ചെയ്യുന്നത് സമീര്‍ താഹിറാണ്. സണ്ണി വെയ്നും ഈ ചിത്രത്തില്‍ ഒരു പ്രധാന വേഷത്തില്‍ അഭിനയിക്കുന്നു. കേരളത്തില്‍ നിന്ന് നാഗാലാന്‍ഡിലേക്കുള്ള ബൈക്ക് യാത്രയാണ് ചിത്രത്തിന്‍റെ തീം.

ഇമ്മാനുവല്‍ തനിക്ക് സംതൃപ്തി നല്‍കിയ സിനിമയല്ലെന്ന് ഫഹദ് ഫാസില്‍.. ഇമ്മാനുവലില്‍ താന്‍ അവതരിപ്പിച്ച കഥാപാത്രത്തെ മിഴിവുറ്റതാക്കാന്‍ ശ്രമിച്ചിരുന്നു. പക്ഷേ അത് ഇഷ്ടപ്പെട്ട് ചെയ്തതല്ല, ബന്ധങ്ങളുടെ പേരില്‍ അഭിനയിച്ചെന്നേയുള്ളുവെന്നാണ് ഫഹദ് പറഞ്ഞത്. ഒരു പ്രമുഖ പത്രത്തിന് നല്കിയ ഇന്‍റര്‍വ്യുവിലാണ് ഫഹദ് ഇക്കാര്യം പറഞ്ഞത്. താന്‍ അഭിനയിച്ച ഒരു കഥാപാത്രവും തനിക്ക് സംതൃപ്തി തന്നിട്ടില്ലെന്ന് ഫഹദ് പറയുന്നു. കരുത്തുള്ള കഥാപാത്രങ്ങളെയാണ് താന്‍ കാത്തിരിക്കുന്നത്. ഇപ്പോള്‍ ഒളിപ്പോര് എന്ന ചിത്രത്തിലാണ് ഫഹദ് അഭിനയിക്കുന്നത്.

ശ്രദ്ധനേടുന്ന യുവ താരം നസ്റിയ നസീം ആര്യക്കൊപ്പം അഭിനയിക്കുന്നു. രാജാ റാണി എന്ന ചിത്രത്തില്‍ ആര്യയുടെ മുന്‍ കാമുകി ആയിട്ടാണ് നസ്റിയയുടെ വേഷം. നയന്‍താരയാണ് ഈ ചിത്രത്തിലെ മുഖ്യ നായിക. അടുത്ത കാലത്ത് ഏറെ ശ്രദ്ധനേടിയ മലയാളി നടികളില്‍ മുന്‍പന്തിയിലാണ് നസ്റിയ. ടെലിവിഷന്‍‌ ഷോകളില്‍ അവതാരകയായി വന്ന് സിനിമയിലെത്തിയ നസ്റിയ അഭിനയിച്ച നേരം എന്ന ചിത്രം തമിഴിലും, മലയാളത്തിലും ഒരേ പോലെ വിജയം നേടിയിരിക്കുന്നു. ധനുഷ് നായകനാകുന്ന നൈയ്യാണ്ടിയിലും നസ്റിയ നായികയാണ്.

സാള്‍ട്ട് & പെപ്പറിന് ശേഷം അസിഫ് അലി, ലാല്‍, മൈഥിലി എന്നിവരൊന്നിക്കുന്ന ചിത്രമാണ് റെഡ്. വസുദേവ് സനല്‍ സംവിധാനം ചെയ്യുന്ന റെഡിന്റെ ഷൂട്ടിംഗ് എറണാകുളത്തും, പരിസരങ്ങളിലും ആരംഭിച്ചു. ഒരു ദിവസം മതി പലരുടേയും ജീവിതം മാറ്റി മറിക്കാന്‍ എന്നതാണ് ചിത്രത്തിന്റെ ടാഗ് ലൈന്‍. അസിഫ് അലി, ലാല്‍ എന്നിവരെ കൂടാതെ ശ്രീനിവാസന്‍, മണിക്കുട്ടന്‍, വിജയകുമാര്‍, നന്ദു, നോബി, സുധീര്‍ കരമന, ജാഫര്‍ ഇടുക്കി, ലെന, വിഷ്ണുപ്രിയ, ലക്ഷ്മി പ്രിയ തുടങ്ങിയവര്‍ ഈ ചിത്രത്തില്‍ അഭിനയിക്കുന്നു. അജി മേടയില്‍, ജോയ് കൈതമറ്റം, ക്രിസ്റ്റി കൈതമറ്റം എന്നിവര്‍ ചേര്‍ന്ന് ഗുഡ് കമ്പനി & ഏഞ്ചല്‍ വര്‍ക്സിന്റെ ബാനറിലാണ് ചിത്രം നിര്‍മ്മിക്കുന്നത്. തിരക്കഥ അരുണ്‍ ഗോപിനാഥ്, അനീഷ് ഫ്രാന്‍സിസ്, പ്രവീണ്‍ കുമാര്‍ എന്നിവര്‍ ചേര്‍ന്ന്. ക്യാമറ അരുണ്‍ ജെയിംസ്. സംഗീതം ഗോപി സുന്ദര്‍. ഗാനരചന റഫീക്ക് അഹമ്മദ്.

മലയാളത്തിന്‍റെ പ്രിയ നടന്‍ മോഹന്‍ലാലിന് 53 വയസ്. മൂന്ന് പതിറ്റാണ്ടായി മലയാളത്തിന് പ്രിയങ്കരനായി തുടരുന്ന മോഹന്‍ലാല്‍ ഇന്ത്യന്‍ സിനിമയിലെ തന്നെ നടന വിസ്മയമെന്ന് വിലയിരുത്തപ്പെട്ടയാളാണ്. കുടുംബത്തോടും, ബന്ധുക്കളോടുമൊപ്പം ചെന്നൈയിലാണ് പിറന്നാളാഘോഷം. ജില്ല എന്ന തമിഴ് ചിത്രത്തില്‍ അഭിനയിച്ചുകൊണ്ടിരിക്കുകയാണ് മോഹന്‍ലാല്‍ ഇപ്പോള്‍. 1960 മേയ് 21ന് പത്തനംതിട്ട ജില്ലയിലെ ഇലന്തൂരില്‍ ആണ് മോഹന്‍ലാല്‍ ജനിച്ചത്. 1978 ല്‍ തിരനോട്ടം എന്ന ചിത്രത്തിലൂടെ സിനിമ രംഗത്തെത്തിയ മോഹന്‍ലാലിന്‍റെ ആദ്യ റിലീസ് 1980 ലെ മഞ്ഞില്‍ വിരിഞ്ഞ പൂക്കളാണ്. ഇന്ത്യയിലെ പ്രതിഭാശാലികളായ നടന്‍മാരുടെ മുന്‍ നിരയിലാണ് മോഹന്‍ലാലിന്‍റെ സ്ഥാനം. കേരളസിനിമ.കോം മലയാളത്തിന്റെ ഈ പ്രതിഭാശാലിക്ക് ജന്മദിനാശംസകള്‍ നേരുന്നു