സുരേഷ് കുമാര്‍ നിര്‍മ്മിച്ച് സന്തോഷ് സേതുമാധവന്‍ സംവിധാനം ചെയ്യുന്ന ചട്ടക്കാരി യുടെ റീമേക്കിന് ഫിലിം എക്‌സിബിറ്റേഴ്‌സ് ഫെഡറേഷന്റെ വിലക്ക്. അടുത്തമാസം 8 ന് ചിത്രം റിലീസ് ചെയ്യാനിരിക്കുകയാണ്. 2009 ല്‍ കേരള നിയമസഭ പാസാക്കിയ നിയമമനുസരിച്ച് 25 രൂപക്ക് മുകളിലുള്ള ടിക്കറ്റിന്‍മേല്‍ മൂന്ന് രൂപ കള്‍ച്ചറല്‍ വര്‍ക്കേഴ്‌സ് ഫണ്ടിലേക്ക് നല്കാമെന്ന് തീരുമാനിച്ചിരുന്നു. ജി. സുരേഷ് കുമാര്‍ ഇതിന്റെ ചെയര്‍മാനായിരുന്നു. എന്നാല്‍ ഇപ്പോള്‍ സുരേഷ് കുമാര്‍ ഈ തീരുമാനത്തിന് തുരങ്കം വെയ്ക്കുന്നു എന്നാരോപിച്ചാണ് ചിത്രത്തിന് വിലക്കേര്‍പ്പെടുത്തുന്നത്. എന്നാല്‍ ചിത്രം പറഞ്ഞ ഡേറ്റില്‍ തന്നെ റിലീസ് ചെയ്യുമെന്ന് സുരേഷ് കുമാര്‍ പറയുന്നു.

ഒന്നൊന്നായി നിരവധി ചിത്രങ്ങള്‍ ബോക്‌സ്ഓഫിസില്‍ തകര്‍ന്ന് വീണ അവസ്ഥയിലാണ് മമ്മൂട്ടി. അവസാനം പുറത്തിറങ്ങിയ ഏഴോളം ചിത്രങ്ങള്‍ യാതൊരു ചലനവും ബോക്‌സ്ഓഫിസില്‍ സൃഷ്ടിച്ചില്ല. ഇപ്പോള്‍ മമ്മൂട്ടി ചിത്രങ്ങള്‍ സെലക്ട് ചെയ്യുന്നതില്‍ കൂടുതല്‍ ശ്രദ്ധാലുവാകുകയാണ്. വിനോദ് വിജയന്റെ പിക് പോക്കറ്റ്, വി.എം വിനുവിന്റെ ഗണപതി എന്നീ ചിത്രങ്ങള്‍ കാന്‍സല്‍ ചെയ്തതായാണ് അറിവ്. ദീപന്‍, അമല്‍ നീരദ് എന്നിവരുടെ ചിത്രങ്ങളുടെ തിരക്കഥ മാറ്റിയെഴുതി കൂടുതല്‍ മികച്ചതാക്കാന്‍ ആവശ്യപ്പെട്ടതായും വാര്‍ത്തയുണ്ട്. കൂടുതല്‍ സുരക്ഷിതമെന്ന് തോന്നുന്ന ലാല്‍ ജോസിന്റെയും, രഞ്ജിതിന്റെയും ചിത്രങ്ങളില്‍ മമ്മൂട്ടി നിശ്ചയിച്ചതിലും നേരത്തെ അഭിനയിച്ചേക്കും. ജോണി ആന്റണിയുടെ താപ്പാന, ജവാന്‍ ഓഫ് വെള്ളിമല എന്നിവയിലാണ് മമ്മൂട്ടി ഇപ്പോള്‍ അഭിനയിക്കുന്നത്.

ഉറുമിയുടെ തിരക്കഥാകൃത്ത് ശങ്കര്‍രാമകൃഷ്ണന് സിനമയില്‍ തിരക്കേറുന്നു. രഞ്ജിതിന്റെ സഹായി ആയി പ്രവര്‍ത്തിച്ചിരുന്ന ശങ്കര്‍ രാമകൃഷ്ണന്‍ സ്പിരിറ്റ് എന്ന രഞ്ജിത് ചിത്രത്തില്‍ മോഹന്‍ലാലിനൊപ്പം ഒരു പ്രധാന വേഷം ചെയ്യുന്നു. രാജേഷ് പിള്ള ട്രാഫികിന്‍ ശേഷം സംവിധാനം ചെയ്യുന്ന ഗോള്‍ഡ് എന്ന ചിത്രത്തിന്റെ തിരക്കഥ ഇദ്ദേഹത്തിന്റേതാണ്. മമ്മൂട്ടി-പ്രിഥ്വിരാജ് അഭിനയിക്കുന്ന അരിവാള്‍ ചുറ്റിക നക്ഷത്രം എന്ന അമല്‍ നീരദ് സംവിധാനം ചെയ്യുന്ന ചിത്രത്തിനും ശങ്കറിന്റേതാണ് തിരക്കഥ. സുരാജ് വെഞ്ഞാറമൂട് നായകനാകുന്ന എന്റെ സത്യാന്വേഷണ പരീക്ഷകള്‍ എന്ന ചിത്രത്തിലും ശങ്കര്‍ ഭാഗഭാക്കാകുന്നു.

തമിഴില്‍ ശ്രദ്ധേയമായ വേഷങ്ങള്‍ക്ക് ശേഷം അമല പോള്‍ മലയാളത്തില്‍ മടങ്ങിയെത്തിയിരിക്കുന്നു. റണ്‍ ബേബി റണ്‍ എന്ന ചിത്രത്തില്‍ മോഹന്‍ലാലിനൊപ്പമാണ് അമലയുടെ തിരിച്ചുവരവ്. ഇതില്‍ ടെലിവിഷന്‍ റിപ്പോര്‍ട്ടറുടെ വേഷമാണ് അമലക്ക്. ജോഷി സംവിധാനം ചെയ്യുന്ന ഈ ചിത്രത്തിന് തിരക്കഥയെഴുതുന്നത് സച്ചിയാണ്.

നടി ഊര്‍മ്മിള ഉണ്ണിയുടെ മകള്‍ ഉത്തര ഉണ്ണി സിനിമയിലേക്ക്. ലെനിന്‍ രാജേന്ദ്രന്റെ ഇടവപ്പാതി എന്ന ചിത്രത്തിലാണ് ഉത്തരയുടെ മലയാളത്തിലെ അരങ്ങേറ്റം. വാവല്‍ പശിങ്ക എന്ന തമിഴ് ചിത്രത്തില്‍ അഭിനയിച്ചിരുന്നെങ്കിലും ചിത്രം റിലീസായിട്ടില്ല. തമിഴില്‍ എ. വെങ്കടേഷ് സംവിധാനം ചെയ്യുന്ന ചിത്രത്തിലും ഉത്തര അഭിനയിക്കുന്നുണ്ട്. ഇടവപ്പാതിയില്‍ സിദ്ധാര്‍ത്ഥ ലാമയാണ് പ്രധാന നടന്‍. മനീഷ കൊയരാള, പ്രശാന്ത് നാരായണ്‍ എന്നിവരും പ്രധാന വേഷങ്ങളില്‍.

അന്‍വര്‍ റഷീദ് സംവിധാനം ചെയ്യുന്ന ഉസ്താദ് ഹോട്ടല്‍ ചിത്രീകരണം പൂര്‍ത്തിയായി. ചില താരങ്ങളുടെ ഡേറ്റ് പ്രശ്‌നം വന്നതിലാണ് ചിത്രം പൂര്‍ത്തിയാകാന്‍ വൈകിയത്. ഒരു വൃദ്ധന്റെയും കൊച്ചുമകന്റെയും ഹൃദയബന്ധത്തിന്റെ കഥയാണ് ഇത്. ദുള്‍ഖര്‍ സല്‍മാനാണ് ചിത്രത്തില്‍ പ്രധാന വേഷം. തിലകനും നിത്യ മേനോന്‍, സിദ്ദിഖ് എന്നിവരും ചിത്രത്തില്‍ പ്രധാന വേഷങ്ങള്‍ ചെയ്യുന്നു. അഞ്ജലി മേനോനാണ് തിരക്കഥ. ചിത്രം നിര്‍മ്മിക്കുന്നത് മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫന്‍.

ഹീറോ, തിരുവമ്പാടി തമ്പാന്‍, നമുക്ക് പാര്‍ക്കാന്‍, ഏഴാം സൂര്യന്‍ എന്നീ ചിത്രങ്ങള്‍ മെയ് 18 ന് റിലീസ് ചെയ്യാനിരിക്കുകയാണ്. എന്നാല്‍ റിലീസിങ്ങ് സെന്ററുകള്‍ കുറവായതിനാല്‍ ചില ചിത്രങ്ങളുടെ റിലീസ് മാറ്റി വച്ചേക്കും. 22 ഫിമെയില്‍ കോട്ടയം, ഓര്‍ഡിനറി, മായമോഹിനി എന്നീ ചിത്രങ്ങള്‍ ഇപ്പോഴും മികച്ച കളക്ഷനോടെ റിലീസിങ്ങ് സെന്ററുകളില്‍ തുടരുകയാണ്. ഈ മാസം അവസാനത്തോടെയേ ഈ ചിത്രങ്ങള്‍ മാറ്റാന്‍ സാധ്യതയുള്ളു. പ്രിഥ്വിരാജ് നായകനാകുന്ന ഹീറോ, ജയറാമിന്റെ തിരുവമ്പാടി തമ്പാന്‍ എന്നീ ചിത്രങ്ങള്‍ അന്നേക്ക മാറ്റിയേക്കും.

ലെനിന്‍ രാജേന്ദ്രന്‍ സംവിധാനം ചെയ്യുന്ന ഇടവപ്പാതിയുടെ ചിത്രീകരണം മൂന്നാറില് പുരോഗമിക്കുന്നു. യോദ്ധ ഫെയിം സിദ്ദാര്‍ഥ് ലാമ അഭിനയിക്കുന്നു എന്ന വാര്‍ത്തയാല്‍ ചിത്രം നേരത്തെ തന്നെ ശ്രദ്ധ നേടിയിരുന്നു. മനീഷ കൊയ്രാളയും ചിത്രത്തില്‍ പ്രധാന വേഷം ചെയ്യുന്നു. ജഗതി ഒരു പ്രധാന വേഷം ചെയ്യാനിരുന്ന ചിത്രമാണ് ഇത്. ഇതിന്റെ ലൊക്കേഷനിലേക്കുള്ള യാത്രയിലാണ് ജഗതിപരിക്കേറ്റ് ആശുപത്രിയിലാകുന്നത്. ജഗതി ചെയ്യാനിരുന്ന വേഷം പ്രശാന്ത് നാരായണ്‍ എന്ന ഹിന്ദി നടനാണ് ചെയ്യുന്നത്. ചിത്രത്തിന്റെ ഛായാഗ്രഹണം മധു അമ്പാട്ട്. രമേഷ് നാരായണ്‍, മോഹന്‍ സിതാര എന്നിവര്‍ സംഗീതം നല്കുന്നു.

അച്ഛനുറങ്ങാത്ത വീടിന്റെ രണ്ടാം ഭാഗം സാമുവേലിന്റെ മക്കള്‍ എന്നായിരുന്നു പേര് നല്കിയിരുന്നത്. ബാബു ജനാര്‍ദ്ധനന്‍ എഴുതി സംവിധാനം ചെയ്യുന്ന ഈ ചിത്രത്തിന്റെ പേര് ലിസമ്മയുടെ വീട് എന്ന് പുനര്‍നാമകരണം ചെയ്തു.നായകനായി നിശ്ചയിച്ചിരുന്ന ഉണ്ണി മുകുന്ദന് തിരക്കായതിനാല്‍ മറ്റൊരാളാവും നായക വേഷം ചെയ്യുക. മീര ജാസ്മിനാണ് നായിക. ഏറെ നാളത്തെ ഇടവേളക്ക് ശേഷമാണ് മീര മലയാളത്തില്‍ മടങ്ങിയെത്തുന്നത്.

ഓര്‍ഡിനറിയുടെ സൂപ്പര്‍ഹിറ്റ് വിജയത്തിന് ശേഷം കുഞ്ചാക്കോ ബോബനും, ബിജു മേനോനും വീണ്ടും ഒരുമിക്കുന്നു. ചാന്ദ് വി ക്രിയേഷന്‍സിന്റെ ബാനറില്‍ അരുണ്‍ ഘോഷും, ബിജു ചന്ദ്രനും ചേര്‍ന്നാണ് നിര്‍മ്മാണം. ഇവരാണ് വെള്ളരിപ്രാവിന്റെ ചങ്ങാതി നിര്‍മ്മിച്ചത്. ചിത്രം സംവിധാനം ചെയ്യുന്നത് ബോബന്‍ സാമുവലാണ്. ചിത്രത്തിന്റെ ഷൂട്ടിംഗ് ഒക്ടോബറില്‍ ആരംഭിക്കും.